Қазақстанда инвестицияларға байланысты алаяқтық жағдайлары жиілеп кетті. Алаяқтар “құпия” табыс стратегияларына қол жеткізу арқылы кепілдендірілген табысты уәде етеді. Алайда, шынтуайтында жәбірленушілер ақшасынан айрылады, ал кейде –  жеңіл пайда аламын деген үмітпен кредит алады.

Алаяқтарды қалай тануға болады?

Көбінесе алаяқтар бірнеше негізгі амалдарды қолданады:

• Манипуляциялар. Сізге шұғыл ақша салу ұсынысымен телефонға қоңырау шалуы мүмкін, кері жағдайда «ерекше мүмкіндікті» жіберіп аласыз
• Тәуекелсіз кепілдендірілген пайда. Инвестицияларда табысқа 100% кепілдік болмайды. Егер сізге тәуекелсіз ақша салу уәде етілсе, бұл алаяқтықтың айқын белгісі.
• Ашық ақпараттың болмауы. Егер компанияда лицензия, ресми сайт, заңды мекенжай және нақты пікірлер болмаса, онымен ынтымақтасу өте қауіпті.
• Ақшаны күмәнді шоттарға аудару туралы өтініштер. Алаяқтар қаражатты жеке карталарға, крипто әмияндарға немесе белгісіз банктердегі шоттарға жіберуді сұрайды.

Оңай табыс – ауыр нәтиже

Жақында Ақмола облысының 55 жастағы тұрғыны тез ақша табу мүмкіндігіне сеніп, алаяқтардың құрбаны болды. Салым ақша  үшін ол 6 миллион теңгеге кредит рәсімдеген, бірақ ақша сол күйде қайтарылмады – қаражат алаяқтардың уысына түсті.

Бұл жағдай проблеманың қаншалықты маңызды екенін көрсетеді.

Өзіңді қалай қорғауға болады?

• Ақпаратты тексеріңіз. Ақшаны инвестицияламас бұрын, ұйымның лицензиясы бар екеніне көз жеткізіңіз. Ресми брокерлердің тізімін ҚНДРА веб-сайтынан табуға болады.
• Қысымға берілмеңіз. Егер сізге мүмкіндікті жіберіп алмау үшін шұғыл түрде ақша салу керек десе, – бұл сақ болуға себеп болады.
• Инвестиция үшін кредит алмаңыз. Егер сізді ақша салу үшін кредит алуға сендіріп жатса – бұл жүз пайыз алаяқтық.
• Интернеттегі жарнамаларға сенбеңіз. Көптеген алаяқтар өздерінің схемаларын әлеуметтік желілер мен мессенджерлер арқылы белсенді түрде насихаттайды.

Еуразиялық банк есіңізге салады: қаржылық қауіпсіздік сіздің қырағылығыңыздан басталады. Өзіңізді және қаржыңызды қорғаңыз!