2 тамыз 2023 жыл

Еуразиялық банк Asian Banking & Finance азиялық бизнес-басылымының нұсқасы бойынша Қазақстанда тауарлық кредит ең жылдам мақұлданатын broker 2.0 онлайн шешімін әзірлегені үшін цифрлық трансформациядағы жыл банкісі деп танылды.

Broker 2.0. — сауда желілеріндегі тауарлық несиені нарықтағы орташа деңгейден он есе жылдам, яғни 4 секундта бағалауға және мақұлдауға мүмкіндік беретін шешім.

“Банк және қаржы индустриясы технология мен тұтынушылардың күтулерінің артуына байланысты үлкен өзгерістерге ұшырауда. Банктер мен финтех-стартаптар арасындағы ынтымақтастықтың кеңеюі, инновацияларды ынталандыру және қаржылық қызметтерге қолжетімділіктің кеңеюі байқалады. Нәтижесінде банк және қаржы индустриясы инклюзивті, тиімді және жеке тұлғалар мен кәсіпорындардың өзгеріп отыратын қажеттіліктеріне сезімтал бола бастады, деп хабарлайды Asian Banking & Finance.

“Қазақстандық банктер үшін бүгінгі таңда мемлекеттік сервистермен интеграция маңызды болып отыр, бұл клиентті тезірек талдауға мүмкіндік береді. Біз сондай-ақ ішкі процестерді барынша жақсарттық, тәуекел моделін өзгерттік және оларды қарыз алушылар туралы ең аз деректерге – телефон нөмірі мен ЖСН-ға бейімдедік. Дәл осы факторлар мақұлдау уақытын он есе қысқартуға мүмкіндік берді. Бүгін біз басқа өнімдердегі тәжірибемізді кеңейтуді жалғастырудамыз”, — деді Еуразиялық банктің басқарма төрағасы Ляззат Сатиева.

Жеңімпаздарды Ernst & Young, Deloitte, PwC, KPMG Singapore, Bain & Co жетекші халықаралық компанияларының топ-менеджерлерінен таңдалған Asian Banking & Finance сарапшылық қазылар алқасы анықтады.

Еуразиялық банк — Қазақстанның әлеуметтік маңызы бар қаржы институты, қазақстандық банктер арасында активтерінің көлемі бойынша жетінші. автонесиелеудегі абсолютті көшбасшы, тауарлық несиелеудегі үздік 3 банктің қатарына кіреді, бөлшек саудада жетекші орын алады, корпоративтік клиенттер мен кәсіпкерлерге қызметтердің кең таңдауын ұсынады. Moody ‘ s — B1 шкаласы бойынша Банк рейтингінің болжамы 2023 жылдың 15 маусымында “оң” бағамен расталды. Банк ERG тобының экожүйесіне жатады (минералды ресурстарды өндіру және өңдеу саласындағы әлемдегі ең ірі компаниялардың бірі).

Asian Banking & Finance (ABF) — Азиядағы қарқынды дамып келе жатқан қаржылық қызметтер индустриясына арналған салалық журнал. Басылым Charlton Media Group ірі медиа компаниясының бөлігі болып табылады.